我城，我守護，香港加油！

今日返工周圍既人都討論佔中，講講下有人話呢d係暴動呀，又叫示威者做暴民，後尾有人用那種世事都被我看透的論調同我講左十幾分鐘佔中點樣影響個經濟，好多人因住呢件事黎攞著數，政治既野好深奥，有好多好多陰謀論，然後同我講你呢d細路女，要再成熟D先了解到政治呢樣野。

我無嬲，亦無同佢爭論政治取態，因為無論你既政治立場係咩，我都好清楚了解用87枚催淚彈去驅趕手無寸鐵既市民係，唔，岩，既！呢個立場係唔會改變！

我其實只係個膽小鬼，第一次出黎集會，自己一個係文華前面企左二十分鐘，其實好淆底。後尾揾左個物資站放低朋友買來既物資，講左句加油就轉左去遮打道静坐。沿路我見到好多人推住物資黎支援，静坐時見到好人係度執垃圾，有人派口罩/退熱貼/濕毛巾等，坐左成個鐘，一句口號都無叫過，就係咁静静地坐係度表達我地既訴求，諗返轉頭都唔知頭先淆咩。

親身感受過，其實成件事好和平，所有人係好有秩序，香港人，係好有質素。

無論你既政治立場是什麼，不論你對政府/佔中/普選/罷課支持與否，屬於你的城市 - 香港正發生緊一件好大既事。與其在電視機前聽別人報導，何不離開電視/電腦，親身行出黎睇下聽下感受下，到現場反思下點解學生唔要前途都要行出黎，點解會有人中完催淚彈訓左幾日街都唔返屋企，思考下到底佢地爭取緊d咩，我相信親身走過這一趟，才能帶給你一個更中肯的觀點。

守護香港，拒絕沉淪，我城，我守護，香港加油！